ఈ జీవనతరంగాలలో...

పదిమాసాలు మోశావు పిల్లలను
బ్రతుకంతా మోశావు బాధలను
ఇన్ని మోసిన నిన్ను
మోసేవాళ్ళు లేక వెళుతున్నావు

పల్లవి

ఈ జీవనతరంగాలలో... ఆ దేవుని చదరంగంలో
ఎవరికి ఎవరు సొంతము ఎంతవరకీ బంధము

చరణం 1

కడుపు చించుకు పుట్టిందొకరు కాటికి నిన్ను మోసేదొకరు
తలకు కొరివి పెట్టేదొకరు ఆపై నీతో వచ్చేదెవరు ||2|| ||ఈ జీవన||


చరణం 2

మమతే మనిషికి బందిఖానా భయపడి తెంచుకు పారిపోయినా
తెలియని పాశం వెంటబడి ఋణం తీర్చుకోమంటుంది ||2||
నీ భుజం మార్చుకోమంటుంది ||ఈ జీవన||

చరణం 3

తాళి కట్టిన మగడు లేడని తరలించుకు పోయే మృత్యువాగదు
ఈ కట్టెను కట్టెలు కాల్చక మానవు
ఆ కన్నీళ్ళకు చితిమంటలారవు
ఈ మంటలు ఆ గుండెను
అంటక మానవు ||ఈ జీవన||