శంకరా... నాదశరీరా పరా

శంకరా... నాదశరీరా పరా
వేదవిహారా హరా జీవేశ్వరా... (2)

చరణం : 1

ప్ర్రాణము నీవని గానమె నీదని
ప్రాణమె గానమనీ
మౌన విచక్షణ గాన విలక్షణ
రాగమె యోగమనీ ||ప్రాణము||
నాదోపాసన చేసిన వాడను
నీ వాడను నేనైతే (2)
ధిక్కరీంద్రజిత హిమగిరీంద్రసిత
కంధరా నీలకంధరా
క్షుద్రులెరుగని రుద్రవీణ నిర్ణిద్ర
గానమిది అవధరించ రా
విని తరించరా ||శంకరా||

చరణం : 2

మెరిసే మెరుపులు మురిసే పెదవుల
చిరుచిరు నవ్వులు కాబోలు
ఉరిమే ఉరుములు సరిసరి నటనల
సిరిసిరి మువ్వలు కాబోలు ||మెరిసే||
పరవశాన శిరసూగంగా
ధరకు జారెనా శివగంగా (2)
నా గానలహరి నువు మునుగంగ
ఆనందవృష్టి నే తడవంగా... ||శంకరా||